پاکستان نے دوسرے ٹی ٹوئنٹی میچ میں آئرلینڈ کو 7وکٹو ں سے شکست دیدی،آئرلینڈ نے دوسرے ٹی20 میچ میں پاکستان کو فتح کے لیے 194 رنز کا ہدف دیا جوقومی ٹیم نے 16.5اوورز میں تین وکٹوں کے نقصان پرپوراکرلیا،فخر زمان نے 40گیندوں پر 78رن کی اننگز کھیلی ، ان کی اننگز میں 6 چھکے اور 6 چوکے شامل ہیں جبکہ محمد رضوان نے 75 رن کی اننگز کھیل کر ناقابل شکست رہے ۔ اعظم خان کی 10گیندوں پر 30رن کی شاندارشکست اننگز کھیلی ، صائم ایوب 6اور کپتان بابراعظم بغیر رن بنائے پویلین لوٹ گئے ۔ڈبلن میں کھیلے گئے سیریز کے دوسرے ٹی20 میچ میں قومی ٹیم کے کپتان بابر اعظم نے ٹاس جیت کر پہلے آئرلینڈ کو بیٹنگ کی دعوت دی۔آئرلینڈ نے اننگز کا آغاز کیا تو اوپنرز پال اسٹرلنگ اور اینڈی بلبرنی نے ٹیم کو 29 رنز کا آغاز فراہم کیا لیکن چوتھے اوور کی دوسری گیند پر شاہین نے آئرش کپتان اسٹرلنگ کی اننگز کا خاتمہ کردیا۔
ابھی میزبان ٹیم اس نقصان سے سنبھلی بھی نہ تھی کہ دو گیندوں بعد شاہین نے اپنی ٹیم کو اہم کامیابی دلاتے ہوئے گزشتہ میچ کے ہیرو بلبرنی کی اننگز کے آگے 16 رنز پر فل اسٹاپ لگا دیا۔
اس کے بعد لورکان ٹکر اور ہیری ٹیکٹر کی جوڑی یکجا ہوئی اور دونوں نے بہترین کھیل پیش کرتے ہوئے تیسری وکٹ کے لیے 62 رنز کی ساجھے داری بنائی۔
ہیری ٹیکٹر نے 32 رنز کی اننگز کھیلی لیکن عباس آفریدی نے شاہین کی مدد سے ٹیکٹر کو چلتا کردیا۔
دوسرے اینڈ سے لورکان نے شاندار کھیل پیش کرتے ہوئے نصف سنچری اسکور کی اور کرٹس کیمفر کے ساتھ مل کر اسکور کو 137 تک پہنچا دیا لیکن عامر نے اپنی ہی گیند پر کیچ لے کر کیمفر کا کام تمام کردیا۔
جیارج ڈوکریل نے 15 جبکہ لورکان نے 34 گیندوں پر 51 رنز کی باریاں کھیلیں۔
اختتامی اوورز میں گیرتھ ڈیلینی نے جارحانہ بیٹنگ کا مظاہرہ کیا اور 10 گیندوں پر دو چھکوں اور 3 چوکوں کی مدد سے 28 رنز بنا کر اپنی ٹیم کو 193 رنز کے مجموعے تک رسائی دلائی۔
آئرلینڈ نے مقررہ اوورز میں 7 وکٹوں کے نقصان پر 193 رنز بنائے۔
پاکستان کی جانب سے شاہین نے تین، عباس آفریدی نے دو جبکہ عامر اور نسیم نے ایک، ایک وکٹیں اپنے نام لیں۔
اس سے قبل پاکستان نے میچ کے لیے ٹیم میں ایک تبدیلی کی تھی اور شاداب خان کی جگہ محمد عامر کو فائنل الیون کا حصہ بنایا گیا تھا۔
یاد رہے کہ سیریز کے پہلے ٹی20 میچ میں آئرلینڈ نے پاکستان کو 5 وکٹوں سے شکست دے کر 0-1 کی برتری حاصل کی تھی۔
میچ کے لیے پاکستانی ٹیم ان کھلاڑیوں پر مشتمل ہے۔
بابر اعظم(کپتان)، صائم ایوب، محمد رضوان، فخر زمان، اعظم خان، افتخار احمد، عماد وسیم، شاہین شاہ آفریدی، محمد عامر، عباس آفریدی اور نسیم شاہ۔