قومی کرکٹ ٹیم کے سابق اسپنر دانش کنیریا نے کہا ہے کہ میں نہیں چاہتا کہ بھارتی ٹیم آئی سی سی چیمپئنز ٹرافی 2025ء پاکستان میں کھیلے۔ انہوں نے اپنی رائے کا اظہار کرتے ہوئے کہا ہے کہ ٹورنامنٹ ہائبرڈ ماڈل میں کھیلا جانا چاہیے، مین ان بلیو (بھارتی ٹیم) نے طویل عرصے سے پاکستان کا سفر نہیں کیا ہے اور یہ واضح نہیں ہے کہ بھارتی حکومت اس بار بھی ٹیم کو پاکستان میں کھیلنے کی اجازت دے گی یا نہیں۔
دانش کنیریا کے مطابق ایشیاء کپ 2023ء ایک ہائبرڈ ماڈل میں کھیلا گیا تھا جس میں بھارت نے سری لنکا میں اپنے میچز کھیلے تھے۔رپورٹ کے مطابق دانش کنیریا نے ‘اسپورٹس ٹاک’ میں گفتگو کے دوران کہا ہے کہ پاکستان میں حالات ٹھیک نہیں ہیں، بھارتی ٹیم کو یہاں (پاکستان) نہیں آنا چاہیے اور پاکستان کو بھی اس بارے میں سوچنا چاہیے، آئی سی سی حتمی فیصلہ کرے گا لیکن میں چاہتا ہوں کہ ٹورنامنٹ ہائبرڈ ماڈل میں کھیلا جائے۔
دانش کنیریا نے بی سی سی آئی کی جانب سے کھلاڑیوں کی حفاظت سے متعلق سوچ کی تعریف کرتے ہوئے کہا کہ کھلاڑیوں کی حفاظت سب سے اہم ہے، عزت دوسری ترجیح ہے، میرے خیال میں بی سی سی آئی بہت اچھا کام کر رہا ہے، تمام ممالک اس فیصلے کو قبول کریں گے اور چیمپئنز ٹرافی ہائبرڈ ماڈل میں کھیلی جائے گی۔انہوں نے کہا کہ پاکستان صرف پیسے کے بارے میں سوچ رہا ہے، اگر بھارت پاکستان آتا ہے تو ملک کو بڑے پیمانے پر مالیاتی فروغ ملے گا اور وہ (پاکستانی حکام) یہی چاہتے ہیں، وہ سیکیورٹی جیسے مسائل کو نہیں دیکھ رہے۔