سابق ٹیسٹ کرکٹر محمد آصف نے پیشگوئی کی ہے کہ 2026ء کے ٹی20 ورلڈکپ میں بھی امریکی پاکستان شکست دے گی۔ یوٹیوب پر ایک پوڈ کاسٹ کے دوران گفتگو کرتے ہوئے 41 سالہ فاسٹ بولر محمد آصف نے پاکستانی ٹیم کو تنقید کا نشانہ بناتے ہوئے کہا کہ پہلی بار ٹی20 ورلڈ کپ کھیلنے والی ٹیم سے ہار رہے ہیں، ٹیم سے بڑا میگا ایونٹ کیلئے اسٹاف پہنچا ہوا تھا۔
انہوں نے کہا کہ محض مہمان ہونے کی وجہ سے میگا ایونٹ کھیلنے والی ٹیم سے ہارنا شرمناک ہے اور جس طرح کی پاکستان کرکٹ چل رہی ہے امریکا ایک مرتبہ پھر پاکستان کو 2026ء کے ٹی ٹونٹی ورلڈ کپ میں ہرا دے گا۔ سابق کرکٹر سے ہوسٹ نے وجہ پوچھی کیوں؟ جس پر انہوں نے کہا کہ 2026ء کے ٹی ٹونٹی ورلڈ کپ سے پہلے ہم کپتان، کوچ اور ٹیم تبدیل کر دیں گے، پوری دنیا 2، 3 سال کا پلان لیکر چلتی ہے لیکن ہمارے پاس ایسا نہیں۔
بالرز پر تنقید کے نشتر چلاتے ہوئے محمد آصف نے کہا کہ ہمارے بائولرز اب فرینڈلی ہوچکے ہیں، انہیں بلے باز چھکا، چوکا لگاتا ہے تو ہنستے ہیں اور اگلے بال پر دوبارہ وہی غلطی دہراتے ہیں۔ انہوں نے کہا کہ ہماری بھی سب سے دوستیاں تھیں لیکر گراؤنڈ میں کوئی چھکا چوکا لگاتا تھا تو وکٹ لینے کیلئے پریشان رہتے تھے ایسے میں کئی بار جرمانے بھی بھگتے، مگر آج کی لاٹ سمجھ نہیں آتی