پاکستانی ایتھلیٹ حیدر علی کا پیرالمپکس میں شاندار کارنامہ

 انہوں نے 52.54 میٹر کی تھرو کے ساتھ تیسری پوزیشن حاصل کی، جو ان کی پیرالمپک کیریئر میں ایک اور بڑی کامیابی ہے۔

پیرالمپک گیمز کے دوران ڈسکس تھرو کے ایف 37 کیٹیگری کا فائنل منعقد ہوا۔ حیدر علی نے اس مقابلے میں 52.28 میٹر کی پہلی تھرو کے ساتھ زبردست آغاز کیا، جو انہیں ابتدائی طور پر پہلی پوزیشن پر لے آئی۔ تاہم، دوسری تھرو فاؤل قرار دی گئی، جس کے بعد ان کی تین مزید تھروز بھی فاؤل ہو گئیں۔

ابتدائی دو راؤنڈز تک حیدر علی نے بہترین کارکردگی دکھائی، لیکن مسلسل فاؤلز کے باعث وہ اپنی پوزیشن برقرار نہ رکھ سکے۔ اس دوران ازبکستان اور کینیڈا کے ایتھلیٹس نے حیدر علی کو پیچھے چھوڑ دیا اور بالترتیب پہلی اور دوسری پوزیشن پر قابض ہوگئے۔ حیدر علی نے اپنی آخری تھرو میں 52.54 میٹر کی تھرو کی، جس کے نتیجے میں انہوں نے برانز میڈل حاصل کیا۔

ازبکستان کے ایتھلیٹ ٹولیبائے نے 57.28 میٹر کی شاندار تھرو کے ساتھ گولڈ میڈل اپنے نام کیا، جبکہ کینیڈا کے جیسی زیسیو نے چاندی کا تمغہ جیتا۔ پاکستان کے حیدر علی نے تیسری پوزیشن حاصل کرتے ہوئے برانز میڈل جیتا۔

یہ حیدر علی کے پیرالمپک کیریئر کا چوتھا میڈل ہے۔ اس سے قبل وہ ٹوکیو پیرالمپکس میں گولڈ میڈل جیتنے میں کامیاب رہے تھے، جو پاکستان کے لیے ایک تاریخی کارنامہ تھا۔ حیدر علی پاکستان کی طرف سے پیرالمپکس میں شرکت کرنے والے واحد ایتھلیٹ ہیں۔

پیرالمپک گیمز میں 4,400 سے زائد ایتھلیٹس 23 مختلف کھیلوں میں شرکت کر رہے ہیں، جہاں دنیا بھر کے معذور کھلاڑی اپنی مہارت کا مظاہرہ کر رہے ہیں۔ حیدر علی کی اس کامیابی نے پاکستان کے لیے عالمی سطح پر ایک اور فخر کا لمحہ فراہم کیا ہے