سکیم کے تحت سولر پینل کی مفت فراہمی
پنجاب کے صارفین کو ماہانہ 200 یونٹ یا اس سے کم بجلی استعمال کرنے پر مفت سولر پینل فراہم کیے جائیں گے۔ اس منصوبے کے تحت سال بھر میں ایک لاکھ سولر سسٹم تقسیم کیے جائیں گے۔ 100 یونٹ استعمال کرنے والے صارفین کو 550 واٹ کا سولر پینل جبکہ 200 یونٹ تک بجلی خرچ کرنے والے صارفین کو 1100 واٹ کا سولر پینل فراہم کیا جائے گا۔
درخواست کا آسان طریقہ کار
صارفین اسکیم میں شامل ہونے کے لیے گھر بیٹھے ایس ایم ایس یا آن لائن پورٹل کے ذریعے درخواست دے سکتے ہیں۔ رجسٹریشن کے لیے صارفین کو اپنے بجلی کے بل پر درج ریفرنس نمبر اور قومی شناختی کارڈ نمبر فراہم کرنا ہوگا جس کی تصدیق کے بعد درخواست قبول کی جائے گی۔
شفافیت کے لیے کمپیوٹرائزڈ قرعہ اندازی
اسکیم میں شفافیت کو یقینی بنانے کے لیے کمپیوٹرائزڈ قرعہ اندازی کی جائے گی۔ کامیاب درخواست دہندگان کی فہرست جاری کی جائے گی، انہیں سولر پینل فراہم کرنے کا عمل شفاف اور مکمل طور پر ڈیجیٹل ہوگا۔
عوام کو مہنگی بجلی سے نجات کا عزم
افتتاحی تقریب میں وزیراعلیٰ پنجاب مریم نواز نے کہا کہ فری سولر پینل اسکیم کا مقصد عوام کو مہنگی بجلی سے مستقل ریلیف دینا ہے۔ حکومت عوام کے وسائل کو ان کی سہولت کے لیے خرچ کر رہی ہے۔ اس اسکیم سے 73 لاکھ صارفین پہلے ہی سبسڈی کے ذریعے مستفید ہو چکے ہیں، یہ منصوبہ توانائی کے بحران کے حل میں اہم کردار ادا کرے گا۔
اضافی اقدامات اور تحفظات
اسکیم کے تحت سولر پینل اور انورٹرز کو چوری سے محفوظ رکھنے کے لیے انہیں صارفین کے قومی شناختی کارڈ سے منسلک کیا جائے گا۔ علاوہ ازیں صارفین کی رہنمائی اور معاونت کے لیے ہیلپ لائن بھی قائم کر دی گئی ہے۔