چیئرمین پی سی بی محسن نقوی نے قومی ٹیم کے ٹی ٹونٹی ورلڈ کپ 2024ء جیتنے کی صورت میں ہر کھلاڑی کے لیے ایک لاکھ ڈالرز انعام کا اعلان کردیا۔ تفصیلات کے مطابق چیئرمین پاکستان کرکٹ بورڈ محسن نقوی نے قذافی اسٹیڈیم میں قومی ٹیم کے ڈریسنگ روم میں کھلاڑیوں سے ملاقات کی جہاں چیئرمین پی سی بی نے کھلاڑیوں کی حوصلہ افزائی کی اور کھلاڑیوں کو بے خوف کرکٹ کھیلنے کی تلقین کی۔
محسن نقوی نے اعلان کیا ہے کہ پاکستان کے ٹی ٹونٹی ورلڈ کپ 2024ء جیتنے کی صورت میں ہر کھلاڑی کو ایک لاکھ امریکی ڈالر (2 کروڑ 77 لاکھ روپے) دیئے جائیں گے۔ واضح رہے کہ چئیرمین پی سی بی نے قومی ٹیم کے ٹریننگ سیشن کے اختتام پر ملاقات کی۔ ان کی کامیابیوں کے اعتراف میں محسن نقوی نے محمد رضوان کو ٹی ٹونٹی میچوں میں 3000 رنز بنانے پر اور نسیم شاہ کو ٹی ٹوئنٹی میچوں میں 100 وکٹیں مکمل کرنے پر خصوصی گرین شرٹس پیش کیں۔
اپنی حمایت کا مزید مظاہرہ کرتے ہوئے نقوی نے ایک مقامی ہوٹل میں کھلاڑیوں اور عہدیداروں کے اعزاز میں ایک ظہرانے کا اہتمام کیا جس میں ٹیم کے اندر دوستی اور حوصلہ افزائی کی گئی۔ واضح رہے کہ پاکستان کرکٹ ٹیم اتوار اور پیر دونوں کو پریکٹس سیشنز بھی کرے گی اور پھر 7 مئی کی صبح آئرلینڈ کے لیے اپنے سفر کا آغاز کرے گی۔ آئرلینڈ اور انگلینڈ کی سیریز کے لیے پاکستانی سکواڈ بابر اعظم، محمد رضوان، صائم ایوب، فخر زمان، عرفان خان نیازی، افتخار احمد، عثمان خان، اعظم خان، شاداب خان، عماد وسیم، شاہین شاہ آفریدی، محمد عامر، نسیم شاہ، حارث رؤف، عباس آفریدی، ابرار احمد، حسن علی، سلمان علی آغا پر مشتمل ہوگا۔
چیئرمین پی سی بی کا ٹی ٹونٹی ورلڈ کپ جیتنے پر فی کھلاڑی کروڑوں روپے کے انعام کا اعلان
