جاری سیاسی کشیدگی کی وجہ سے پاکستان اور بھارت نے 2012ء سے کوئی دو طرفہ کرکٹ سیریز نہیں کھیلی ہے۔ بھارتی حکومت نے اپنے کرکٹ بورڈ کو ہدایت کی ہے کہ وہ پاکستان کے ساتھ مقابلوں کو آئی سی سی یا اے سی سی ایونٹس تک محدود رکھے۔ فی الحال یہ بحث جاری ہے کہ آیا ہندوستانی ٹیم اگلے سال ہونے والی چیمپئنز ٹرافی کے لیے پاکستان کا سفر کرے گی۔
ابتدائی طور پر بھارتی میڈیا نے مثبت اشارہ دیا لیکن حال ہی میں ٹیم کے سرحد پار نہ کرنے کے حوالے سے بات چیت تیز ہو گئی ہے۔ اس کے درمیان آئی سی سی کی سالانہ کانفرنس کولمبو، سری لنکا میں ہو رہی ہے جس کے ایجنڈے میں اضافی بجٹ کے باوجود چیمپئنز ٹرافی کے میچوں کو ممکنہ طور پر کسی دوسرے ملک میں منتقل کرنا شامل ہے۔
گزشتہ سال ہندوستانی ٹیم نے ایشیا کپ کے لیے پاکستان کا سفر کرنے سے انکار کر دیا تھا جس کے نتیجے میں ان کے میچ سری لنکا میں منعقد کیے گئے تھے۔
اس بار پی سی بی نے سختی سے کہا ہے کہ ہائبرڈ ماڈل ناقابل قبول ہے اور یہ کہ پورا ایونٹ پاکستان میں ہونا چاہیے۔ پی سی بی کے چیئرمین محسن نقوی کولمبو میں ہیں توقع ہے کہ وہ بی سی سی آئی کے سربراہ جے شاہ سے ملاقات کریں گے تاکہ انہیں ہندوستانی ٹیم کو پاکستان بھیجنے پر راضی کیا جاسکے۔ تاہم پی سی بی نے تسلیم کیا کہ حتمی فیصلہ بی سی سی آئی نہیں بلکہ بھارتی حکومت کرے گی۔