انگلینڈ کے سابق کرکٹر کیون پیٹرسن نے پاکستان میں کرکٹ کی موجودہ صورتحال پر مایوسی کا اظہار کرتے ہوئے افسوس کا اظہار کیا ہے۔
کیون پیٹرسن کا کہنا ہے کہ پاکستان کرکٹ ٹیم میں جو ٹیلنٹ اور جوش کبھی نظر آتا تھا وہ ختم ہوگیا ہے۔
پاکستان کرکٹ ٹیم کو ورلڈ کپ میں شکست کے بعد سے شدید تنقید کا سامنا ہے جہاں بابر الیون کو اپنے بیشتر میچوں میں مسلسل شکستوں کا سامنا کرنا پڑا اور وہ سیمی فائنل کے لیے کوالیفائی کرنے میں ناکام رہی۔
ٹیسٹ سیریز میں شکست کا سلسلہ جاری ہے، پاکستان بنگلا دیش سے پہلا ٹیسٹ میچ ہار گیا ہے۔ یہ پاکستان کی کرکٹ کی تاریخ میں پہلی بار ہے کہ گرین شرٹس بنگلا دیش کے خلاف ہوم گراؤنڈ پر ٹیسٹ میچ ہارے۔
جیسا کہ کرکٹ شائقین قومی ٹیم کی ناقص کارکردگی سے پریشان ہیں، کیون پیٹرسن بھی خاموش نہ رہ سکے۔ کیون پیٹرسن نے ایکس پر کہا، “پاکستان میں کرکٹ کو کیا ہوا؟ جب میں نے پی ایس ایل میں کھیلا تو اس لیگ کا معیار بہت اچھا تھا۔ نوجوان کھلاڑیوں کا ٹیلنٹ کا مظاہرہ جادوئی تھا۔”
سابق انگلش کپتان اور طوفانی بلے باز کیون پیٹرسن نے بھی سوال کیا کہ وہاں کیا ہو رہا ہے؟ یعنی پاکستان میں کرکٹ اور کرکٹ ٹیم کے ساتھ کیا ہو رہا ہے جو انکی پرفارمنس بلکل ختم ہورہی ہے۔
ورلڈ کپ میں مایوسی کے بعد بنگلا دیش کے خلاف شکست نے کھلاڑیوں کی فٹنس اور کارکردگی کے حوالے سے مزید تشویش پیدا کردی ہے۔ ٹیسٹ میچ کے پانچویں دن پاکستانی ٹیم نے 146 رنز بنائے اور بنگلہ دیش کو 30 رنز کا معمولی ہدف دیا جو اس نے بغیر کوئی وکٹ کھوئے آرام سے حاصل کر لیا۔ اس سے قبل بنگلا دیش کو پاکستان کے خلاف 13 میں سے 12 ٹیسٹ میچوں میں شکست ہوئی تھی اور صرف ایک میچ ڈرا ہوا تھا۔